တေးသံရှင်မေဆွိနှင့် တွေ့ဆုံခြင်း

Written by သန့်ဇင်ဦး

အမေရိကန်ပြည်ထောင်စုတွင် နေထိုင်နေရာမှ မြန်မာနိုင်ငံသို့ ပြန်လည် ရောက်ရှိလာပြီးနောက် တေးသံရှင် မေခလာနှင့် နှစ်ယောက်တွဲ ဖျော်ဖြေပွဲတွင် သီဆိုမည့် တေးသံရှင် မေဆွိနှင့် တွေ့ဆုံ၍ ဖျော်ဖြေပွဲတွင် သီဆိုဖျော်ဖြေမည့် သီချင်းများ၊ သူနှင့် ပတ်သက်၍ ထွက်ပေါ်ခဲ့ဖူးသော ကောလာဟလ များအပေါ်အမြင်၊ အမေရိကတွင် နေထိုင်စဉ် ဘဝဖြတ်သန်းမှုနှင့် ဆက်လက် အကောင်အထည် ဖော်သွားမည့် အနုပညာစိတ်ကူးများ အကြောင်းကို The Voice က မေးမြန်းထားခြင်း ဖြစ်သည်။

Voice ။ ။ မမေခလာနဲ့ အစ်မနဲ့ နှစ်ယောက်တွဲ ဖျော်ဖြေပွဲလေးလုပ်ဖို့ စိတ်ကူး ဖြစ်ပုံလေး ပြောပြပေးပါဦး။

MS ။ ။ အမှန်တကယ်ကတော့ လွန်ခဲ့တဲ့ သုံးလလောက်တုန်းက အစ်မမြန်မာပြည်ကို တစ်ခေါက် ပြန်လာတုန်းက ဒီပွဲလေး လုပ်ဖို့ မငယ် (မေခလာ) က အစ်မကို ပြောတယ်။ ဒါပေမဲ့ အစ်မက အဲဒီအချိန်တုန်းက ညီထွဋ်ရယ်၊ ဟေမာရယ်၊ ထွန်းအိန္ဒြာဗိုတို့နဲ့ ‘မောင် . . ယုံလား . . နှစ်ယောက်မရှိဘူး’ ဆိုတဲ့ပွဲမှာ ဆိုရမှာရယ်၊ အမေရိကကို ပြန်ဖို့ ကိစ္စတွေ အတွက်ရယ် အလုပ်ရှုပ်နေတယ်။ ပြန်ဖို့ရှိတယ် ဆိုတာကလည်း အစ်မရဲ့ အစ်မနှစ်ယောက်နဲ့ တူတော်မောင်နဲ့က ဗီဇာရတာနဲ့ သူတို့ကိုလည်း အစ်မက အလည်ခေါ်ချင်တာနဲ့ ဟိုကိုပြန်ကို ပြန်ရမှာပေါ့နော်။ နောက်သုံးလလောက် နေလို့ မဆွေ မြန်မာပြည်ကို ပြန်လာတဲ့ အခါကျရင် လုပ်ချင်လုပ် ပေါ့လို့ပြောတော့ သူက သီတင်းကျွတ်လောက်မှာ လုပ်ချင်တယ်လို့ ပြောတော့ မဆွေလည်း သဘောတူခဲ့တာ။

Voice ။ ။ ဂီတလောကမှာ မေဆွိနဲ့ မေခလာက မတည့်ကြဘူးလို့ ကောလာဟလ ထွက်ခဲ့ဖူးတယ်နော်။ မဆွေတို့ နှစ်ယောက်တွဲ ဖျော်ဖြေပွဲဆိုပြီး မရှိခဲ့တာက ပွဲစီစဉ်သူတွေက မလုပ်ဖြစ်ခဲ့လို့လား။ တခြားဘာ အကြောင်းတွေ ရှိဦးမလဲ။

MS ။ ။ အမှန်တကယ်ကတော့ အားလုံးက မေ့သွားတာ ဖြစ်လိမ့်မယ်။ မြန်မာ ပြည်ဦးသိန်းတန်က Play Boy အဖွဲ့ကနေ ထွက်လာပြီး LPJ ဆိုပြီး တီးဝိုင်းထောင်တဲ့ အချိန်မှာ အစ်မရော၊ မငယ်ရော၊ ကိုင်ဇာရော၊ တူးတူးတို့ရော၊ ကိုခိုင်ထူးတို့ရော အဲဒီတီးဝိုင်းမှာ ပင်တိုင်အနေနဲ့ ဆိုကြတယ်။ အစ်မတို့ အဲဒီတုန်းကဆို ပြည်ထောင်စု အလံကြီး သယ်သွားတဲ့ မြို့တွေမှာ အမြဲတမ်း ညဘက် စတိတ်ရှိုး ရှိတယ်။ အဲဒီပွဲတွေမှာဆိုရင် မငယ်နဲ့အစ်မတို့ အမြဲတမ်း ဆိုဖြစ်တယ်။ နောက်ပိုင်း ကျတော့မှ ကိုင်ဇာနဲ့မငယ်နဲ့ အိမ်ထောင်ပြုသွားတဲ့ အချိန်မှာ ကောလာဟလ လေးတွေ ထွက်လာတာပေါ့နော်။ အစ်မအနေနဲ့ ကတော့ ဘာမှမဖြစ်ပါဘူး။

Voice ။ ။ အခု နှစ်ယောက်တွဲ ဖျော်ဖြေပွဲမှာ ကျတော့ အစ်မရဲ့ သီချင်းတွေထဲက ဘယ်သီချင်းတွေ ဆိုဖို့ စဉ်းစားထားလဲ။

MS ။ ။ အစ်မကတော့ ပြီးခဲ့တဲ့ ‘မောင် . . ယုံလား . . နှစ်ယောက်မရှိဘူး’ ပွဲတုန်းက ဆိုထားတဲ့ သီချင်းလေးတွေနဲ့ မတူအောင် နည်းနည်းစဉ်းစားပြီး ဆိုမယ်လို့ စိတ်ကူးထားတယ်။ နောက်ပြီး Plus 3 တီးဝိုင်းနဲ့လည်း နည်းနည်းညှိပြီး မတူတဲ့ သီချင်းလေးတွေ ရွေးဆိုမှာပေါ့။ မငယ်နဲ့လည်း တစ်ယောက်သီချင်း တစ်ယောက် အတူတွဲပြီး ဆိုကြဦးမယ်။ သူအရင်တုန်းက ဆိုခဲ့တဲ့ သီချင်းတွေ ဆိုရင်တော့ အစ်မအတွက် အဆင်ပြေတယ်။ အခုနောက်ပိုင်း ထွက်ထားတဲ့ စီးရီး တွေထဲက သီချင်းတွေ သူဆိုမယ်ဆိုရင်တော့ မဆွေက စာသားရအောင် ကျက်ရမှာပေါ့။

Voice ။ ။ အစ်မက အောင်မြင်တဲ့ မြန်မာသံ သီချင်းတွေ အများကြီးလည်း ဆိုခဲ့ဖူးတာ ဆိုတော့ ဒီပွဲမှာရော မြန်မာသံ သီချင်းတွေထဲက ဘယ်သီချင်းတွေဆိုဖို့ စိတ်ကူးထားလဲ။

MS ။ ။ မြန်မာသံ သီချင်းတွေကတော့ မငယ်နဲ့ နှစ်ယောက် တိုင်ပင်ပြီးဆိုဖို့ ရှိပါတယ်။ ဥပမာ- မငယ်က သူအောင်မြင်ခဲ့တဲ့ တသိမ့်သိမ့်သူလို သီချင်းမျိုးကို တို့နဲ့တွဲပြီး ဆိုမယ် ဆိုရင်တော့ တို့က ဆိုပေးရမှာပေါ့။ အဓိကကတော့ လာကြည့်တဲ့ ပရိသတ်အတွက် အစ်မတို့ ပုံစံလေးတွေ မတူအောင် လုပ်ဖို့ စိတ်ကူးထားတယ်။ မငယ်ရဲ့ ဖျော်ဖြေမှု အပိုင်းမှာက ကလေးတွေနဲ့ Performance လေးတွေ ထည့်ဦးမယ်ဆိုတော့ ဆန်းဆန်းပြားပြား လေးတော့ ဖြစ်မှာပါ။

Voice ။ ။ အစ်မတို့ နှစ်ယောက်ရဲ့ ဖက်ရှင်ပိုင်း အတွက်ရော ဘယ်လိုစီစဉ်ထားလဲ။

MS ။ ။ အစ်မ သိသလောက်တော့ မငယ်က အစ်မတို့ နှစ်ယောက်ရဲ့ ဖက်ရှင်ပိုင်းအတွက် ဒီဇိုင်နာ မိုးကုတ်ပေါက်ပေါက် ဆီမှာ စပွန်ဆာ တောင်းထားတယ်လို့ ပြောတယ်။ ပေါက်ပေါက် ဆိုရင်တော့ စိတ်ချရတာပေါ့လေ။ အစ်မတို့ကသာ နှစ်ယောက် Match ဖြစ်အောင် ဘယ်လိုပုံစံမျိုးလေး ဝတ်ချင်တယ် ဆိုတာ သူ့ကိုပြောပြရမှာပေါ့။

Voice ။ ။ အမေရိကမှာ နေထိုင်စဉ်တုန်းက ဂီတနဲ့ ပတ်သက်ပြီး ဘာတွေလုပ်ဖြစ်လဲ။

MS ။ ။ အစ်မက အမေရိကမှာရှိတဲ့ မြန်မာ ပရိသတ်တွေနဲ့တော့ မဝေးဘူးပေါ့နော်။ အမြဲတမ်းလိုလို မင်္ဂလာဆောင်တို့၊ သင်္ကြန်ပွဲတို့၊ အလှူပွဲတို့၊ စတိတ်ရှိုးမှာ အစ်မ သွားဆိုဖြစ်တယ်။ သီချင်းကတော့ အမြဲတမ်း ဆိုဖြစ်ပါတယ်။ အမေရိကမှာတင် မဟုတ်ဘူး။ အင်္ဂလန်တို့၊ သြစတြေးလျတို့၊ ဂျပန်တို့မှာ လုပ်တဲ့ ဖျော်ဖြေပွဲတွေလည်း အစ်မ သွားဆိုဖြစ်တယ်။

Voice ။ ။ အစ်မက အမေရိကမှာကျတော့ ဆရာမလုပ်တယ်။ ဒီမှာတုန်းက ကိုယ်က နိုင်ငံကျော် တေးသံရှင် တစ်ယောက်လေ။ ဒီလိုမတူတဲ့ ဘဝနှစ်ခုမှာ ဖြတ်သန်းရတဲ့အခါ အစ်မစိတ်ထဲမှာ ဘယ်လိုခံစားရလဲ။

MS ။ ။ အစ်မအတွက် အဲဒါက ဘာမှပြဿနာ မရှိဘူး။ ဘာကြောင့်လဲဆိုတော့ ကိုယ်နဲ့ အလုပ်အတူ တွဲလုပ်တဲ့သူတွေက မြန်မာနိုင်ငံမှာ အစ်မက နာမည်ကြီးတဲ့ အဆိုတော် တစ်ယောက်ဆိုတာ သူတို့သိချင်မှ သိမှာလေ။ သာမန်လူ တစ်ယောက်အနေနဲ့ အစ်မက ဒီအလုပ်ကို လုပ်တာဆိုတော့ ကိုယ်က နိုင်ငံကျော် အဆိုတော် တစ်ယောက်ပါလို့ ပြောစရာလည်း မလိုဘူးလို့ ထင်တယ်။
ဆရာမအလုပ်ကို လုပ်တဲ့အချိန်မှာ ကိုယ်နဲ့ လုပ်ဖော်ကိုင်ဖက် ဆရာမတွေအားလုံးနဲ့ အစ်မ အဆင်ပြေအောင် ပေါင်းသင်း ဆက်ဆံတယ်။ ကိုယ့်အလုပ်ကိုလည်း တာဝန် ကျေအောင် လုပ်တဲ့အခါကျတော့ ဘာမှတော့ အနှောင့်အယှက် မရှိဘူး။ ဒါပေမဲ့ အရမ်းခင်တဲ့ ဆရာမ နှစ်ယောက်ကတော့ အစ်မက မြန်မာပြည်က နာမည်ကြီး အဆိုတော်ဆိုတာ သိကြတယ်။ ထုံးစံအတိုင်းပေါ့ကွာ။ မြန်မာပြည်မှာ နေတုန်းကဆို အိမ်မှာခိုင်းတဲ့သူ ရှိတယ်။ တစ်နေရာရာ သွားမယ်ဆိုလည်း ဒရိုင်ဘာက ကားမောင်း ပို့ပေးတယ်။ အမေရိကမှာတော့ အဲဒီလိုတွေ မရှိဘူးပေါ့။ အဲဒီတော့ အစ်မက ပင်ပန်းတဲ့ အခါတွေမှာလည်း ညည်းမိတယ်။ မြန်မာပြည်မှာဆိုရင် ဘယ်သူက ဘယ်လိုလုပ်ပေးမှာပေါ့။ တစ်နေရာရာ သွားရင်လည်း ကိုယ်တိုင်ကား မောင်းစရာ မလိုဘူးလို့ ပြောတဲ့အခါ သူတို့က နင်အဲ့ဒီလို နေတာလားဆိုပြီး အံ့သြတကြီးနဲ့ မေးကြတယ်။ အဲ့ဒီအခါ အစ်မက ဟုတ်တယ်။ အစ်မ အမေဆိုရင် အကယ်ဒမီ ဘယ်နှဆု ရထားတဲ့ မင်းသမီးပေါ့နော်။ သူတို့နိုင်ငံက အယ်လီဇဘတ် တေလာတို့၊ ဘာတို့နဲ့ Compare လုပ်ပြတယ်။ အစ်မအကြောင်းကို အဲ့ဒီဆရာမ နှစ်ယောက်တော့ သိတယ်။ ဒါပေမဲ့ သူတို့က အစ်မတို့နိုင်ငံက လူတွေလို မဟုတ်ဘူး။ ကိုယ်နဲ့မဆိုင်တဲ့ ကိစ္စဆို ဘာမှပြောလေ့ ထုံးစံမရှိဘူး။ အဲဒီတော့ ကျန်တဲ့သူတွေကတော့ အစ်မအကြောင်းကို မသိကြ ဘူး။

Voice ။ ။ ဆရာမတစ်ယောက်ရဲ့ ဘဝကိုရော အစ်မသဘောကျလား။

MS ။ ။ အစ်မ သဘောကျတယ်။ ဘာကြောင့်လဲဆိုတော့ ကလေးတွေနဲ့ အလုပ်လုပ်ရတာ အစ်မကြိုက်တယ်။ အခုဒီမှာဆိုလည်း အဲဒီကျောင်းတွေ ဖွင့်နေကြပြီလေ။ ဒါပေမဲ့ ဒီက ကလေးကျောင်းတွေက အစ်မ ဟိုမှာလုပ်ခဲ့တဲ့ ကျောင်းတွေလောက်တော့ မဖြစ်သေးဘူး။ လိုအပ်ချက် ကလေးတွေ အစ်မမြင်နေတယ်။ တဖြည်းဖြည်းတော့ ဖြစ်လာမှာပေါ့လေ။ တကယ်တော့ ကလေး တွေကို ပြုစုပျိုးထောင်တယ် ဆိုတာ လွယ်တဲ့ကိစ္စ မဟုတ်ပါဘူး။ ဒီမှာသာ မိဘတွေက ကိုယ့်ကလေးကိုယ် Take Care လုပ်ကြတာ။ ဟိုမှာက မိဘတွေက ကလေးမွေးပြီး သုံးလလောက်နေလို့ ကိုယ့်အလုပ်တွေ ကိုယ်သွားကြတဲ့အခါ အိမ်မှာ ကြည့်ပေးမယ့်သူ မရှိဘူးလေ။ အဲဒီတော့ ကလေးတွေကို Day Care ပို့ကြတာမျိုးတို့၊ ကျောင်းတွေ ပို့ကြတာမျိုး ဆိုတော့ ဆရာမတွေနဲ့ ကလေးတွေကပိုပြီး Close ဖြစ်တယ်။ ကလေးတွေမှာ Tension ရတာတို့၊ ကလေးတွေက ဆရာမတွေကို ချစ်ခင်ဖို့ ဆိုတာက ဆရာမတွေအပေါ် အများကြီး မူတည်တယ်။ သူတို့ ကြီးပြင်းလာတဲ့အခါ ကောင်းမွန်တဲ့ ဘဝလမ်းကြောင်းကို လျှောက်နိုင်ဖို့ ပြုစုပျိုးထောင်ပေးရတဲ့ အတွက် တို့ကတော့ ဆရာမဘဝကို ကြိုက်တယ်။

Voice ။ ။ အစ်မက အမေရိကမှာ ဆရာမအဖြစ် တော်တော်ကြာကြာ လုပ်ခဲ့တာဆိုတော့ သူတို့ဆီက သင်ကြားမှုပုံစံနဲ့ ကျွန်တော်တို့ဆီက သင်ကြားမှုပုံစံမှာ ကွာဟနေတဲ့ အချက်တွေကို ပြောပြပေးပါဦး။

MS ။ ။ သင်ကြားမှု အပိုင်းကတော့ သိပ်ကွာမယ် မထင်ဘူး။ ဒါပေမဲ့ ကလေးတွေရဲ့ လုံခြုံမှု အပိုင်းကတော့ ကွာမယ်ထင်တယ်။ အစ်မတို့ ဟိုကကျောင်းတွေက Private School တွေဆိုပေမယ့် Clinic ရှိတယ်။ Registered Nurse တွေရှိတယ်။ အဲဒီအတွက် ကလေးတွေ တစ်ခုခုဖြစ်ရင် ကုသ ပေးနိုင်တယ်။ နောက်ပြီး အစ်မတို့ဆရာမ တွေကလည်း ကလေးတွေ ဘယ်အချိန်မှာ ဘာဖြစ်တတ်တယ် ဆိုတာ Training ယူထားရတယ်။ ဒီမှာတော့ အဲ့ဒီအပိုင်းတွေ နည်းနည်း လိုသေးတယ် ထင်တယ်။

Voice ။ ။ အစ်မ အလုပ်လုပ်ခဲ့တဲ့ ကျောင်းနဲ့ ဆရာမလုပ်သက် ဘယ်လောက်မှာ အနားယူခဲ့တယ် ဆိုတာ ပြောပြပေးပါဦး။

MS ။ ။ အစ်မနေတဲ့ Delaware မှာ ပြည်နယ်မှာရှိတဲ့ Middle School တစ်ခုမှာ အစ်မ ဆရာမ လုပ်ခဲ့တယ်။ အစ်မကတော့ Pre School လောက်အထိပဲ သင်တယ်။ အဲ့ဒီကျောင်းမှာ အစ်မ ဆရာမအဖြစ် ငါးနှစ်လောက် လုပ်ခဲ့တယ်။ ဒီတစ်ခေါက် မြန်မာပြည်ကနေ ပြန်သွားတဲ့ အချိန်မှာ အစ်မ အလုပ်ထွက်လိုက်တယ်။

Voice ။ ။ အစ်မရဲ့ရှေ့ဆက်မယ့် ဘဝကိုရော ဘယ်လိုပုံစံနဲ့ ဆက်သွားဖို့ စဉ်းစားထားလဲ။

MS ။ ။ အခုကတော့ အစ်မမြန်မာပြည်ကို အပြီးနီးပါး ပြန်လာတဲ့ သဘောမျိုး ဆိုတော့ အစ်မဝါသနာပါတဲ့ သီချင်းဆိုတဲ့ အလုပ်ကိုလုပ်ပြီး ပရိသတ်နဲ့ အမြဲထိတွေ့နေအောင် ပြန်လုပ်ဖို့ စိတ်ကူးထားတယ်။ နောက်ပြီး ဒီမှာ အနေကြာတဲ့အခါ စီးရီး ပြန်လုပ်မယ်ဆိုရင် ဘယ်လို သီချင်းမျိုးလေး တွေလုပ်မလဲ၊ ဘယ်လို Idea နဲ့ လုပ်မလဲဆိုတာ အစ်မစဉ်းစားဖြစ်တယ်။ ငွေရေး ကြေးရေးနဲ့ အမြတ်အစွန်း အတွက်တော့ မဟုတ်ဘူး။ ပရိသတ်တွေနဲ့ ပြန်ပြီးထိတွေ့ ဆက်ဆံချင်တဲ့ သဘောပါ။ နောက်ပြီး အစ်မက မြန်မာသံကြိုက်တဲ့ ပရိသတ်တွေအတွက် ကိုဓီရာမိုရ်နဲ့ တိုင်ပင်ပြီး သူ့ရဲ့ Music Arrangement တွေနဲ့ မြန်မာသံ သီချင်းခွေတစ်ခွေ လုပ်ဖို့လည်း စိတ်ကူးထားတယ်။

Voice ။ ။ ဂီတလောက နောက်ပိုင်း ပေါ်လာတဲ့ တေးသံရှင်တွေထဲက ဘယ်သူတွေကို အစ်မ သဘောကျလဲ။

MS ။ ။ အစ်မ အခုနောက်ပိုင်း နားထောင် ဖြစ်တာက ချမ်းချမ်းတို့၊ နေနေတို့၊ နီနီခင်ဇော်တို့ နားထောင်ဖြစ်တယ်။ အယ်လ်ဆိုင်းဇီတို့၊ လေးလေးဝါးတို့၊ ဝိုင်းစုခိုင်သိန်းတို့လည်း အစ်မ နားထောင်ခဲ့တယ်။ သူတို့ကတော့ တစ်ခေတ်ပေါ့လေ။ အစ်မက ဒီအနုပညာ လောကထဲမှာ အမြဲတမ်း ကျင်လည်နေမှာမို့လို့ သီချင်းတွေနဲ့ အဆက်မပြတ် သွားအောင်တော့ ဘယ်လိုသီချင်းမျိုးတွေ ဆိုနေကြလဲ ဆိုတာသိအောင် အမြဲတမ်း နားထောင် ဖြစ်ပါတယ်။

Voice ။ ။ ပရိသတ်တွေအတွက် သီချင်းတွေအပြင် ဇာတ်ကားတွေ ပြန်ရိုက်ဖို့ရော အစီအစဉ်ရှိလား။

MS ။ ။ ဇာတ်ကား ပြန်ရိုက်ဖို့ကတော့ ကိုယ့်ဟာကိုယ် လုပ်နိုင်၊ မလုပ်နိုင် သေချာဆန်းစစ် ပြီးတော့မှပဲ စဉ်းစားဖြစ်မယ်။ အစ်မက ဇာတ်ကားတွေ မရိုက်တာ တော်တော်ကြာပါပြီ။ ရုပ်ရှင်ရိုက်တယ် ဆိုတာလည်း ရုပ်ရှင်လောကမှာ တောက်လျှောက်ကြီး ရိုက်ပြီးနေခဲ့တာ မဟုတ်ဘူး။ ရုပ်ရှင်ဇာတ်ကား အနည်းငယ်လောက် ရိုက်ပြီး သီချင်းပဲ ဆိုခဲ့တာဆိုတော့ ရုပ်ရှင်ရိုက်ခဲ့တဲ့ အချိန်က တိုပါတယ်။ ရုပ်ရှင်ရိုက်ခဲ့တဲ့ အခါမှာလည်း ကိုယ်နဲ့ ဦးလေးလို၊ အစ်ကိုလိုခင်ခဲ့တဲ့ သူတွေနဲ့သာ ရိုက်ခဲ့တာ ဆိုတော့လေ။ အဲဒီလို လူမျိုးတွေကသာ ပြန်ပြီး ကမ်းလှမ်းမယ်ဆိုရင် အစ်မစဉ်းစား ဖြစ်မှာပါ။ အထူးသဖြင့် ဦးမီးပွားတို့ ပေါ့နော်။

Voice ။ ။ ဒီပွဲမှာ ဦးကိုင်ဇာကိုရော ဧည့်သည် အဆိုတော်အနေနဲ့ ခေါ်ဆိုဖို့ ရှိလား။

MS ။ ။ အစ်မကတော့ သူ အချိန်လေးပေးပြီး အစ်မတို့ နှစ်ယောက်ရှိုးမှာ လာ ဆိုပေးမယ်ဆိုရင် Welcome ပါပဲ။ ဒါမှမဟုတ် ဒီမှာ မဆိုဖြစ်ဘူးဆိုလည်း နောက်တစ်ခါ ပွဲလုပ်တဲ့အခါ ဆုံကြမှာပေါ့။ ကိုယ်နဲ့ သူနဲ့က ရွယ်တူတွေလည်း ဖြစ်တယ်။ သူ့သီချင်း၊ ကိုယ့်သီချင်းလည်း သိနေကြတာ ဆိုတော့ အချိန်မရွေး အဆင်ပြေပါတယ်။

Voice ။ ။ အစ်မတို့ နှစ်ယောက်ရဲ့ ဖျော်ဖြေပွဲကို လာရောက် ကြည့်ရှုမယ့် ပရိသတ်တွေ အတွက် ဒီပွဲလေးက ဘယ်လိုရသမျိုး ပေးစွမ်းနိုင်မယ်ထင်လဲ။

MS ။ ။ အစ်မကတော့ ဒီပွဲလေးကို လာကြည့်တဲ့ ပရိသတ်တွေ အရမ်းကောင်းတဲ့ ပွဲဆိုပြီး ပီတိလေးနဲ့ ပြန်သွားတာမျိုး ဖြစ်စေချင်တယ်။ သေချာတာကတော့ ဒီပွဲလေးကို အစ်မတို့ အရွယ်တန်း ပရိသတ်တွေပဲ လာကြည့်ကြမှာပါ။ တကယ်လို့ သူတို့ သားသမီးတွေကို ခေါ်ပြီး လာကြည့်တယ် ဆိုရင် တောင်မှ ဒါမေမေတို့ ငယ်ငယ်တုန်းက နာမည်ကြီးခဲ့တဲ့ အဆိုတော်တွေလို့ ပြောပြီး ခေါ်လာလို့သာ စိတ်ဝင်စားတဲ့ ကလေးတွေက လိုက်ချင် လိုက်လာကြမှာပါ။ သူတို့ရဲ့ တန်ဖိုးရှိတဲ့ အချိန်တွေကို ပေးပြီး လာကြမယ့်ကြတဲ့ ပရိသတ်တွေ စိတ်ကျေနပ်မှု ရစေမယ့် ပွဲမျိုးဖြစ်အောင် အစ်မတို့ ကြိုးစားမှာပါ။

The Voice