ရဲတပ်ဖွဲ့ဝင်များ၏နောက်ကို ကျော်ကြည့်ဖူးပါသလား

---------------
ရေးသားသူ- ထွန်းခိုင်၊ အောင်ခိုင်

နှုတ်ခမ်းမွေးရေးရေးဖြင့် အဆီပြန်နေသည့် မျက်နှာများရှိသည့် လူကြမ်းမင်းသားများကို မြန်မာဗီဒီယိုဇာတ်လမ်းများ ကြည့်ဖူးသူတိုင်း သိကြလိမ့်မည်။ သူတို့သည် ဇာတ်ကားများထဲ အမြဲတစေဆိုးသွမ်းကြသည်။ ဇာတ်ဆောင်မင်းသား မည်မျှပြောင်းပြောင်း သူတို့သည် လူကြမ်းနေရာတွင် ပါဝင်သရုပ်ဆောင်ရသည်။

မြန်မာ့နိုင်ငံရေးနှင့် သမိုင်းအဖြစ်အပျက်များကို ပုံဖော်ရာတွင်လည်း အမြဲတစေဆိုးသွမ်းသည့်နေရာမှ ပါရသူများရှိသည်။ တစ်ခါတစ်ရံတွင် လက်ထဲကိုင်ထားသည့် ဒိုင်းများကို နံပါတ်တုတ်များဖြင့် တဖြန်းဖြန်းရိုက်ရင်း ဆန္ဒပြသည့်သူများဆီသို့ ချီတက်လာကြသည်။ တစ်ခါတစ်ရံတွင်မူ သေနတ်များ မိုးပေါ်ထောင်ပစ်ကာ ဆန္ဒပြသူများကို ဖြိုခွဲကြသည်။ တစ်ခါတစ်ရံတွင်တော့ ရဟန်းရှင်လူပြည်သူများ၊ ကျောင်းသားများကို နံပါတ်တုတ်ဖြင့် ရိုက်၊ သေနတ်ဖြင့်ပစ်ခတ်သည့် မြန်မာနိုင်ငံ၏ လူကြမ်းမင်းသားများအဖြစ် ကမ္ဘာကျော်ကြသည်။

၎င်းတို့မှာ ပဋိပက္ခဖြစ်စဉ်များ၊ ဆန္ဒပြပွဲများကို ကိုင်တွယ်ဖြေရှင်းကြသည့် လုံထိန်းရဲတပ်ဖွဲ့ဝင်များပင်ဖြစ်သည်။

အစိုးရသစ်လက်ထက်တွင်ပင် ရဲတပ်ဖွဲ့ဝင်များ၊ လုံထိန်းတပ်ဖွဲ့များနှင့် ဆန္ဒပြကန့်ကွက်သူများကြား အကြီးအကျယ် ထိပ်တိုက်တွေ့ဆုံမှု ငါးကြိမ်ထက်မနည်း ဖြစ်ပွားခဲ့သည်။ ယင်းပဋိပက္ခများအတွင်း အရပ်သားနှစ်ဦးသေဆုံးကာ ၁၀၀ ကျော် ဒဏ်ရာရခဲ့သည်။ ရဲတပ်ဖွဲ့ဝင်များဘက်ကမူ တစ်ဦးသေဆုံးခဲ့ပြီး ဒါဇင်နှင့်ချီသည့် ရဲတပ်ဖွဲ့ဝင်များ ဒဏ်ရာရခဲ့သည်။ အဆိုပါအရေအတွက်တွင် ရခိုင်ပြည်နယ်အတွင်း လုံခြုံရေးရယူထားသည့် လုံထိန်းရဲများနှင့် ဘင်္ဂါလီများနှင့် ဖြစ်ပွားခဲ့သည့် အရေအတွက်များ မပါဝင်သေးပါ။

၂၀၀၇ က သံဃာတော်များအား ရန်ကုန်မြို့လယ်တွင် ရိုက်နှက်ဖမ်းဆီးခဲ့သည့် ယခင်စစ်အစိုးရ၏ တတိယအဆင့်အမြင့်ဆုံးပုဂ္ဂိုလ်နှင့် ၀န်ကြီးချုပ်တာဝန်ထမ်းဆောင်ခဲ့သူတို့ကိုပင် မြန်မာ့ပြုပြင်ပြောင်းလဲရေး၏ အဓိကဇာတ်လိုက်ကျော်များအဖြစ် ပြည်တွင်းပြည်ပမီဒီယာများက ပုံဖော်ကြသည်။

သို့သော်လည်း ရွှေဝါရောင်တော်လှန်ရေးအတွင်း နာမည်ဆိုးဖြင့်ကျော်ကြားခဲ့သည့် လုံထိန်းများကတော့ မြန်မာ့ပြုပြင်ပြောင်းလဲရေးဇာတ်လမ်းတွင် လူကြမ်းနေရာမှပင် ဆက်လက်ကပြ အသုံးတော်ခံနေရဆဲဖြစ်သည်။

ခေတ်အဆက်ဆက် ပြည်သူများက ဝေဖန်သည့် ရက်ရက်စက်စက်နှိမ်နင်းခြင်းများ၊ ပစ်ခတ်ဖြိုခွဲမှုများ ဘာကြောင့်ဆက်လက်လုပ်ဆောင်နေရသနည်းဆိုသည်ကို လုံထိန်းတပ်ဖွဲ့ဝင်အချို့နှင့် တွေ့ဆုံမေးမြန်းစဉ် ထည့်သွင်းမေးမြန်းခဲ့သည်။ ပြည်သူများက မုန်းတီးနေသည့် ၎င်းတို့အနေဖြင့် ပြည်သူအပေါ် ဘယ်လိုသဘောထားပါသလဲဟုလည်း မေးမြန်းခဲ့သည်။ ဖြေဆိုသူ လုံထိန်းတပ်ဖွဲ့ဝင်အများစုကတော့ သူတို့သည်လည်း အခြားတိုင်းသူပြည်သူများလိုပင် စနစ်၏သားကောင်များဖြစ်နေကြောင်း ပြန်လည်ဖြေကြားခဲ့သည်။ တွေ့ဆုံမေးမြန်းသူများထဲတွင် လက်ပံတောင်းတောင်ပဋိပက္ခ လုံခြုံရေးတာဝန်ယူထားသူများ၊ ရခိုင်ပဋိပက္ခလုံခြုံရေးရယူထားသည့် လုံထိန်းရဲများ ပါဝင်သည်။

သူတို့သည်လည်း သာမန်ပြည်သူများလိုပင် အရည်အသွေးနိမ့်ကျသည့် ကျန်းမာရေးစောင့်ရှောက်မှုများ၊ မလောက်ငသည့်လစာငွေများ၊ သက်တမ်းလွန် အစားအသောက်များကြား ဘ၀ကို ခက်ခဲစွာ ရုန်းကန်နေရသူများဖြစ်ကြောင်း ပြောဆိုကြသည်။

သူတို့အတွက် ပိုပိုသာသာဖြစ်ရသည့်တစ်ခုမှာ အထက်ကပေးသည့်အမိန့်ကို အတိအကျ လိုက်နာရခြင်းပင်ဖြစ်သည်ဟု ၎င်းတို့ကဆိုသည်။

လာဘ်စားမှု၊ အာဏာအလွဲသုံးစားလုပ်သည့် ရဲတပ်ဖွဲ့ဝင်တို့ ရှိသည်ကိုတော့ ၎င်းတို့က၀န်ခံခဲ့ပြီး အထက်ကပေးသည့်အမိန့်များကို ဖော်ဆောင်ရခြင်းများကြောင့်လည်း ၎င်းတို့နာမည်ဆိုးဖြင့် ကျော်ကြားလာရခြင်းဖြစ်ကြောင်း ပြောသည်။

“ဖြစ်ခဲ့တဲ့ မလက်တို၊ ရှားခဲအင်း၊ လက်ပံတောင်းအားလုံးကို ကြည့်လိုက်။ ကျွန်တော်တို့ အကျိုးစီးပွားအတွက် တစ်ခုမှမရဘူး။ အခုခရိုနီလို့ခေါ်ခေါ်နေတဲ့သူတွေနဲ့ လယ်သမားတွေအကြားဖြစ်ရတဲ့ ပြဿနာတွေ။ တကယ်တမ်းဖြစ်တော့ လုံထိန်းတွေပဲနာမည်ပျက်တယ်။ အထိနာတယ်။ ဘာသာရေးအရကြည့်ရင်လည်း ငရဲကြီးတယ်”ဟု ဧရာဝတီတိုင်းဒေသကြီးအတွင်းမှ လုံထိန်းတစ်ဦးကပြောသည်။

နိုင်ငံတကာမီဒီယာစာမျက်နှာများပေါ်တွင် နာမည်ဆိုးဖြင့် ကျော်ကြားနေသည့် လုံထိန်းတစ်ယောက်ဘ၀ကလည်း တကယ်တန်းတော့ ထင်သလောက်မလွယ်။ ဒုတိယကမ္ဘာစစ်လက်ကျန် လက်နက်များကိုင်ဆောင်ပြီး ဈေးပေါပေါဖြင့် ၀ယ်၍ရသော တရုတ်လုပ်ဦးထုပ်များဆောင်းကာ ဒေါသထွက်နေသည့် လူအုပ်များကို ရင်ဆိုင်ရသည်။

ဆန္ဒပြလူအုပ်အပေါ် အနည်းငယ် အတိမ်းအစောင်းဖြစ်လို့မရ။ မီဒီယာများ၊ လူ့အခွင့်အရေးလှုပ်ရှားသူများနှင့် ပြည်သူများ၏ ဝေဖန်သံများကို ပြင်းပြင်းထန်ထန် ရင်ဆိုင်ရနိုင်သည်။ ထို့အပြင် အထက်အရာရှိ၏ အပြစ်ပေးကြိမ်းမောင်းမှုများ၊ ရာထူးလျှော့ချခံရမှုများလည်း ကြုံတွေ့ရနိုင်သည်။

“ရဲထဲမှာတောင် လုံထိန်းလုပ်ချင်တဲ့သူ ရှားတယ်။ ဒေသခံရဲပဲလုပ်ချင်ကြတယ်။ လုံထိန်းတပ်ထဲက ရဲတွေရဲ့မိန်းမတွေက ဈေးရောင်းပြီး အိမ်အတွက် ၀င်ငွေရှာရတယ်။ လုံထိန်းမိန်းမတွေက အရာရှိတွေအိမ်မှာ အလှည့်ကျသွားကူလုပ်ပေးရတဲ့နေ့ အိမ်ကမိန်းမတွေ ဈေးမထွက်နိုင်လို့ မိသားစုအတွက် စိတ်ပူရတဲ့ လုံထိန်းတွေလည်း အများကြီးရှိတယ်”ဟု ရခိုင်ပြည်နယ်တွင် တာဝန်ထမ်းဆောင်နေသည့် လုံထိန်းအရာရှိတစ်ဦးကပြောသည်။

“ရခိုင်မှာဆို ဒေသခံတွေက ကျွန်တော်တို့ကို “ကုလားကာ”လို့ ခေါ်တယ်။ ဘင်္ဂါလီတွေကို ကာကွယ်လို့ဆိုပြီး။ ဘင်္ဂါလီတွေ သောင်းကျန်းရင် ကြောက်တယ်မပစ်ဘူး။ ကာကွယ်ပေးတယ်ပေါ့။ ဘင်္ဂါလီတွေ ရွာထဲမှာဆိုလည်း ပြဿနာဖြစ်လာရင် လူအုပ်က ဂျင်ကလိနဲ့ပစ်တယ်။ ခဲနဲ့ထုတာ ခံရတယ်။ ကိုယ်မထိအောင် ဒိုင်းတွေနဲ့ မနည်းကာရတယ်။ ပစ်မိန့်မရလို့ ငုံ့ခံနေခဲ့ရတာလည်း ခဏခဏပဲ”ဟု အဆိုပါအရာရှိကပြောသည်။

ရဲတပ်ဖွဲ့ဝင်များအတွက် ပြည်သူလူထုအပေါ် ပြုကျင့်ရမည့် ကျင့်ဝတ် (၁၀)ပါးအနက် နံပါတ်ခြောက်တွင် အောက်ပါအတိုင်းရေးသားထားသည်။

“ပြည်သူလူထု၏ ယုံကြည်ကိုးစားမှုကို ရယူပါ”

မြေပြင်အခြေအနေတွင်တော့ စာထဲမှာရေးသားထားသည်နှင့် ကွဲလျက်ရှိသည်။

ယခုလ တတိယပတ်အတွင်းက အစိုးရအရာရှိများရုံးစိုက်ရာ နေပြည်တော်တွင် ပြန်ကြားရေးဝန်ကြီးဌာနမှ လယ်မြေများ သိမ်းဆည်းသည်ဟုဆိုကာ ဒေသခံများက အပြင်းအထန်ကန့်ကွက်ကြသည်။

ဦးဆောင်ပါဝင်သူများကို ထိန်းသိမ်းရန် အဆိုပါရွာသို့ ရဲတပ်ဖွဲ့ဝင်များ သွားရောက်ခဲ့သည်။ ဒေသခံများနှင့် ရဲများအကြား ထိပ်တိုက်တွေ့ဆုံမှုဖြစ်ပွားခဲ့ပြီး ရဲတပ်ဖွဲ့ဝင်အချို့ကို ဒေသခံများက ထိန်းသိမ်းလိုက်သည်။

အဆိုပါအဖြစ်အပျက်မှ တိုင်တွင်ကြိုးတုပ်ခံရသော ရဲတပ်ဖွဲ့ဝင်တစ်ယောက်၏ပုံကို 7Day Daily က ရရှိခဲ့ပြီး ရေးသားဖော်ပြခဲ့သည့်သတင်းကို ဖေ့စ်ဘွတ်ခ်စာမျက်နှာတွင် ဖော်ပြခဲ့သည်။ တိုင်တွင် လက်ပြန်ကြိုးတုပ်လျက် အနည်းငယ်ပင်ပန်းနွမ်းနယ်နေပုံပေါက်သည့် အဆိုပါရဲတပ်ဖွဲ့ဝင်အပေါ်တွင် မှတ်ချက်ပေးသည့်သူများအနက် စာနာသနားမည့်သူ လွန်စွာနည်းပါးခဲ့သည်။

Kolay Lwin ဆိုသည့်အမည်ဖြင့် ဖေ့စ်ဘွတ်ခ်သုံးစွဲသူက “သူခိုးဓားပြနှင့် ရဲအတူတူပဲ။ သူတို့ကိုယ်တိုင် သိက္ခာမရှိဘူး”ဟု ရေးသားကာဝေဖန်ခဲ့သည်။

အံ့အားသင့်စရာကောင်းသည့်အချက်မှာ အဆိုပါအဖြစ်အပျက် စတင်ဖြစ်ပွားစေသည့် လယ်မြေသိမ်းဆည်းသူများ၊ နစ်နာသူများအား ညှိနှိုင်းရာတွင် အောင်မြင်အောင် မဆောင်ရွက်နိုင်သူများကို မည်သူမျှအပြစ်မတင်ခဲ့ကြခြင်းပင်ဖြစ်သည်။

လုံထိန်းများနှင့် ဒေသခံများအကြား မကြာခဏထိပ်တိုက်တွေ့သည့် ဧရာဝတီတိုင်းဒေသကြီးမှ ဒေသလွှတ်တော်ကိုယ်စားလှယ်တစ်ဦးဖြစ်သည့် သာပေါင်းမဲဆန္ဒနယ်အမတ် ဦးဝင်းသိန်းကတော့ နှစ်ဖက်အကြား ထိပ်တိုက်မတွေ့ရန် ပြဿနာများကို တင်းမာမလာမီ ဖြေရှင်းကြရန် အကြံပြုခဲ့သည်။

“ပြဿနာစဖြစ်တာ ရဲကစတာမဟုတ်ဘူး။ မကျေနပ်လို့ ဆန္ဒဖော်ထုတ်မယ်ဆိုရင်လည်း ခွင့်ပြုသင့်တယ်။ ဆူမှရဲကိုသွားပြီး ဖြေရှင်းခိုင်းတာမျိုးမဖြစ်အောင် လုပ်ဖို့လိုတယ်”ဟု ဦးဝင်းသိန်းက အကြံပြုသည်။

“ရဲတပ်ဖွဲ့အနေနဲ့ လူ ၂၀၀ ခန့်ကို ဟန့်တားနိုင်တဲ့ ပစ္စည်းတွေ၊ နည်းလမ်းတွေ ကြိုတင်ပြင်ဆင်ယူလာသင့်ပါတယ်။ အ၀ိုင်းခံရတော့မှ အသက်ဘေးက ကာကွယ်ရတဲ့အခါမှာ အသက်ချင်းလဲယူ ဆောင်ရွက်ရတဲ့အဖြစ်ဟာ မဖြစ်သင့်ပါဘူး”ဟု ဒေသခံနှစ်ဦးသေဆုံးပြီး နှစ်ဦးဒဏ်ရာအပြင်းအထန်ရခဲ့သည့် ရှားခဲအင်းဖြစ်စဉ်အပြီး ၎င်းကပြောကြားခဲ့ဖူးသည်။

အစိုးရသစ်တက်လာသည်မှာ ၂ နှစ်ကျော်ခဲ့ပြီဖြစ်သည်။ မြန်မာ့နွေဦးဟုတင်စားသည့် အကူးအပြောင်းအချိန်ကာလတွင် ယခင်အစိုးရလက်ထက် နာမည်ဆိုးဖြင့်ကျော်ကြားသူများ နေ့ချင်းညချင်း ဒီမိုကရေစီဘက်တော်သားများ ဖြစ်ကုန်သည်။ ၎င်းတို့ကိုမှီခိုကာ ချမ်းသာကြသူများ ပိုချမ်းသာလာကြသည်။

သို့သော်လည်း အစိုးရအရာရှိကြီးများ၊ ၎င်းတို့အားမှီခိုနေသည့် ခရိုနီကြီးများ သိမ်းယူထားသည့်မြေများ၊ လူ့အခွင့်အရေး ချိုးဖောက်မှုများအတွက် ပြည်သူများကလည်း ယခင်အတိုင်း လမ်းမများပေါ်ထွက်ကာ ဆန္ဒပြနေဆဲဖြစ်သည်။ ဆန္ဒပြသည့်လူအုပ်ကြီးကို နှိမ်နင်းရန် လုံထိန်းများကလည်း ယခင်အတိုင်း အမိန့်နာခံနေရဆဲ ဖြစ်ပါသည်။

မြန်မာ့နွေဦးဇာတ်လမ်းများတွင် မင်းသားများပြောင်းသွားခဲ့သော်လည်း လူကြမ်းများအဖြစ် လုံထိန်းများ ဆက်လက်ကပြနေရဆဲဖြစ်သည်။ ပြည်သူများလည်း ထိုလူကြမ်းများအောက် အသက်ကိုလုနေရဆဲ ဖြစ်ပါသည်။